احط لك العشا

مانكبنا غير بعض امثالنا اللي نصدقها وكن اللي حاطها نيوتن مو واحد فاضي ماعنده لاشغله ولامشغله

غير صرف حكم مجانية من جنب القده، زي المثل اللي يقول ان اسهل طريق الى قلب الرجل بطنه،

هالمثل خلا الحريم عندنا شغالات حشي اكل في بطون رجالهن لين طقهم الضغط والسكر والكلسترول،

هذا اذا كانت تطبخ ولاتجيب الاكل من اقرب مطعم اسهل واسرع لأن الاخت ماتعرف تطبخ

وتقرف ان الخدامة تطبخ ونص اكلهم من المطاعم،

ولاعاد فيه مشروع ناجح اكثر من مشروع توصيل مطاعم وسط حوارينا،

تشوف هالدبابات وسيارات المطاعم ماغير تخافق بين الحواري شغاله توصيل اكل،

وش خلانا بلشانين بكبر كروشنا غير حريمنا اللي ماعندهم مواهب زوجية ومعلومات

غير ان بطنك هي الطريق الوحيد الى قلبك، اللي مصلحها ربي منهن أول ماتدخل عليها ماعندها غير كلمة: احط لك الأكل؟

ماتقول ياهلا بهالطلة والا نور البيت والا فديت مهند حقي، ابد ماتعرف تغازلك غير بسالفة احط لك الاكل،

واذا صارت رومانسية مرة تسألك قبل وش ناوي تعشى اليوم؟ هذا اطلق ماتعرفه حريمنا عشان يدلعون ازواجهم،

ويستغربون من كثر الطلاقات وكثر العوانس، ويحملون الرجال المسؤولية

وتلاقيهن بمجالسهن متفقات ان الرجل هو ساس البلاء وانهن مظلومات وساكتات،

وهن لو تقارنهن بالزوجات في دول ثانية كان طلعن راسبات ولالهن دور ثاني!